अग्निपथ सिनेमाच्या संवादात मराठी तरुणाचे योगदान
– अविनाश घोडकेने दिला सिनेमाला मराठी टच
स्वाती केतकर , मुंबई
एका सामान्य मराठी माणसाच्या संषर्घाची कहाणी सांगणाऱ्या बहुचचिर्त
‘अग्निपथ’ सिनेमात अजय- अतुल या मराठी संगीतकार जोडीने ‘चिकनी चमेली’
गाण्याने हिंदी सिनेसृष्टीत धमाल उडवली असतानाच, या सिनेमाच्या मेकिंगमध्ये
आणखी एका मराठी माणसाचे मोलाचे योगदान असल्याचे समोर आले आहे. मराठी
माणसाची, मराठी संस्कृतीची आणि मुख्य
म्हणजे मुंबईची पार्श्वभूमी असलेल्या या सिनेमाला खास मराठमोळा टच यावा,
यासाठी अविनाश घोडके या मराठी तरुणाने सहसंवादलेखक म्हणून कामगिरी बजावली
आहे.
‘ अग्निपथ’चे संवाद लेखक पियूष मिश्रा यांनी लिहिले आहेत.
मात्र मिश्रा हे उत्तर भारतीय असल्याने स्क्रिप्टलाही उत्तर भारतीय लहेजा
आला होता. दिग्दर्शक करण मल्होत्राला या कथेला खास ‘मुंबय्या’ गंध हवा
होता. ते काम त्याने सोपवले अविनाशवर. पटकथेत फरक न करता वाक्यांवर,
शब्दांवर काम करून संवादांना मुंबय्या टच देण्याची अवघड कामगिरी अविनाशला
पार पाडायची होती. मुख्यत: संजय दत्तने रंगवलेल्या कांचा चीना आणि ऋषी
कपूरच्या रौफ लाला या दोन पात्रांवर त्याने विशेष मेहनत घेतली. त्यांच्या
संवादामध्ये अविनाशचा मोठा वाटा आहे.
सिनेसृष्टीतच काम करण्याचा
निश्चय अविनाशने सिद्धार्थ कॉलेजमध्ये असतानाच केला होता. शाम बेनेगलांचा
‘मंडी’ हा सिनेमा पाहिला आणि सिनेमातच कोणत्या तरी विभागात काम करायचे असे
त्याने पक्के ठरवले. मग कधी स्टिल्स कर, तर कधी डिरेक्शनमध्ये हात मार, कधी
अॅक्टिंग कर, तर कधी कॅमेरा सेटिंग अशा वेगवेगळ्या बाजूंनी तो या
क्षेत्रात झगडत राहिला. या प्रवासातच एका मित्राने अचानकच लिखाणाची ऑफर
दिली. अविनाशने हेही आव्हान स्वीकारले. थैमान, देवदासी या दोन मराठी
सिनेमांसाठी लेखन केले. ‘सगळं करून भागलो’ या सिनेमासाठी गीतेही लिहिली.
दरम्यान, त्याने एक हिंदी स्क्रिप्टही लिहिले. अनिल कपूर, सतीश कौशिक,
आशुतोष गोवारीकर यांसारख्या अनेक प्रोड्युसर्स, डिरेक्टर्सना तो ही स्क्रिप्ट नरेट करीत होता..
ही स्क्रिप्ट गोवारीकरांकडे
आली असताना ‘अग्निपथ’चा दिग्दर्शक करण मल्होत्राने ती वाचली आणि गेल्या
जानेवारीत अविनाशला फोन करून ‘मेहबूब स्टुडिओ’त बोलवून. मराठी संस्कार
करण्यासाठी ‘अग्निपथ’ची स्क्रीप्ट त्याच्या हातात सोपवली आणि या निमित्ताने
त्याच्याही आयुष्यात एका नवीन ‘अग्निपथा’ची सुरुवात झाली…..
Maharashtra Times /26 Jan 2012
About The Author
